ته چې سم په لارې نه درومې له خياله

ته چې سم په لارې نه درومې له خياله
 ليونی به شي ډير ما غوندې تر کاله

په سينه مې لک د تا د بڼو غشي
 د زړه سر مې دی دا غدار د تا له خياله

لکه اور چې په پنبه کې ساتی نه شي
 صبوري په عشق کې هسې ده محاله

غمجن زړه به زما هله مګر روغ شي
 که پرې څوک ستا د وصال کيږدي دسماله

د اوبو غريق خبر له ځانه نه وي
 د غمونو ډوب به څه پوښتې له حاله

د پاخه عاشق ژوندون د يار په غم دی
 کارسازي په نوي عشق کې کړه د لاله

يو ساعت يې په دنيا ژوندون محال دی
 که کامګار شي نااميد ستا له وصاله